Ka Nishan Jong Ka Jingshai
No. 1
Nishan jong ka jingshai;
Muhor jong ka jingstad bad jingshemphang;
Dak jong ka jingsyiad bad jingrhem,
Bad ka Jinglaitluid ruh kumjuh.
Ngi thang ia kane ka sharak ban shahshkor ia ka jingkhot sha ka jingim thymmai man la sngi.
Ai ba ngin ioh ka jingkyrmen bad ka jingshlur ba thymmai mynta ka sngi,
Ai ba ngin kynmaw ruh ba shibun kiei kiei kiba bha bad kiba sniew ki ap ban kympein ia ka dohnud, ki jingmut jingpyrkhat bad ka mynsiem jong ngi.
********************************************
Ka Jingshai Jong Ka Jingkyrmen
No.2
Kumba ngi ialum mynta, ngi tbeh jingshai ia kane ka sharak, ka dak jong ka jingkyrmen.
Ai ba ka jingshai mynsiem kan tynshain ha ngi iwei pa iwei man la ka sngi.
Ai ba ka jingshai jong ka jingshisha, ka jingbha kan long ka bynta ba khlemkut jong ka jingim jong ngi.
Ai ba ngin long namar kata kiba tbeh ia ka jingshai ha ki por jong ka jingkah syrngiew baroh.
********************************************
Ka Jingpule Thang Sharak
No. 4
Ngi ainguh na ka bynta kane ka sngi kaba kyntang,
Naka bynta kane ka kynhun mynsiem ba kordor jong ngi.
Ngi thang ia kane ka sharak jong ka jingngeit,
Ai ba ki phliah ding ba bun jong ngi kin ia kynduh bad longlang ban pynlong ia ka kynhun jong ngi kaba khlain haka dohnud bad rhem haka mynsiem.
********************************************
Ka Jingpule Thang Sharak
No. 5
Ka jingim ka dei ka jingai sngewbha kaba ngi sngewnguh shi katdei eh.
Ngi ialang ha kawei ban pyndonburom ia ki jingkyrkhu bad ki jingphylla jong kane ka jingai sngewbha kaba khraw.
********************************************
Ka Jingpule Thang Sharak
No. 6
Ai ba ka jingshai kaba ngi tbeh mynta kan pyrsad mynsiem ia ngi ban pyndonkam iala ka bor ban pynkoit; ym ban pynmynsaw, ban iarap; ym ban khanglad, ban kyrkhu; ym ban tim, ban shakri ia phi ka mynsiem jong ka jinglaitluid.
********************************************
Ka Jingpule Thang Sharak
No. 7
Man la ka step ngi dei ban bat ia ka jingshai ba phyrnai jong ka jinglah jong ngi ban pdiang, ban rah ia ka kylleng bad ban ai biang ia ka sha kiwei pat kiba donkam ia ka jingshai.
********************************************
Ka Jingpule Thang Sharak
No. 8
Ngi tbeh ia kane ka jingshai ban pyndonburom ia ka jingieid kaba don hapoh jong ngi, hapdeng jong ngi bad baroh sawdong jong ngi.
********************************************
Ka Jingpule Thang Sharak
No. 9
Ai ba kane ka jingshai kan tynshain hapoh jong ngi,
Ka jingsyaid jong ka jingsngewlem
Ka jingphyrnai jong ka jingieid
Ka jingrhem mynsiem jong ka jing-aitilut
Ka jingshai jong ka jingshisha.
********************************************
Ka Jingpule Thang Sharak
No. 10
Ai ba kane ka jingshai kan long
Kum ka jingshai jong ka jingstad bad jingshemphang hapoh ki jingmut jingpyrkhat jong ngi,
Kumjuh ruh kum ka jingsyaid jong ka jingieid hapoh ki dohnud jong ngi.
********************************************
Ka Jingpule Thang Sharak
No. 11
Ngi tbeh ia ka jingshai jong ka jingstad;
Ai ba ka jingiasngewthuh jingmut kan don hapdeng jong ngi
Ngi tbeh ia ka jingshai jong ka jingieid; Ai ba ka jingiada kan don hapdeng jong ngi
Ngi tbeh ia ka jingshai jong ka jingkhuid; Ai ba ka mynsiem jong ka jingia-tylli lang kan don hapdeng jong ngi.
********************************************
Ka Jingshai Haka Por Kaba Kyntang
No. 12
Kumba kiwei kiba hashwa ia ngi, ki wad ia ka por kaba kyrpang ban tbeh ia ki sharak; Ngi mynta ngi wad ban pynkylla ia kane ka por sha kawei na ki por kaba kyrpang bad kyntang tam da kaba tbeh ia ka jingshai jong ka khuri- ding (chalice), kaba long ka dak jong ka jingngeit jong ngi.
********************************************
Ka Jingpule Thang Sharak No. 13
Ngi kynthah ding ia kane ka sharak ban pynkynmaw ia lade ba u soh jong ka mynsiem u long ka jingieij, ka jingkmen, ka jingsuk, ka jingshisha, ka jingsbun ka jingbha, ka jingiaineh, ka jingjemnud bad ka bor halor lade.
Ai ba kane ka sharak kan pynkynmaw ruh ia ngi ba ngin ialeh bad trei shitom ban bet ia u symbai jong kine ki jinglong baroh ha ka jingim ba man la ka sngi jong ngi.
********************************************
Ka Jingpule Thang Sharak No. 14
Kane ka sharak ka ieng na ka bynta ka dak kaba pynkynmaw ia ngi ba ngin long kiba iaishah, wat hapdeng ka jingsliew jong ki eriong ka por. Ba ngin jop ia ki jingpynshoi baroh bad da ki kjat barit ngin iai minot thop.
********************************************
Thang Sharak Ban Pynkyntang
No. 15
Ngi thang ia kane ka sharak
Kum ka dak ka jingpynkyntang ia kane ka por kaba ngi ialumlang mynta,
Ngi pynkyntang ia kane ka Jingiaseng ha ka jong phi nam Amen.
********************************************
To mynta ngi thang ia kane ka sharak
No. 16
Kum ka dak ban pynkyntang ia kane ka jingialumlang jong ngi mynta ha kane ka jingiaseng.
Ngi thang ia kane ka sharak ban kynmaw ieid iala ki jong kiba ieid ba thoin jong ngi ki bym don shuh bad ngi.
To ngin thang ia kine ki sharak kiban ieng kum ka dak naka bynta jong ki, bad ba ngin sngew iaka jinglonglem jong ki bad ngi mynta hangne bad lano lano ruh.
********************************************
Ka Jingshai Kaba La Shap Haka Dohnud Briew
No. 17
Ngi ialumlang mynta kum ka kynhun kaba angnud ia ka jingieit bad kaba dap da ka jingkyrmen.
Ngi wan ban pdiang iaka jingkyrkhu Blei kaba ngin sa ioh lyngba kane ka jingmanelang.
Ngi tbeh ia kane ka sharak kaba long ka dak jong ka jingshai kaba la shap haman kawei pa kawei ka dohnud briew.
Ai ba ki phliah ding jong ngi shimet shimet kin ia kynduh bad ai jingsyiad bad jingshai ia ngi bad ia ka pyrthei baroh phar.
********************************************
17.
KI JINGPULE HABA THANGSHARAK
Nga thang ia kane ka sharak
Kaba long ka dak ka jingshai mynsiem,
Kaba la shap ha man ki dohnud briew.
Ai ba ka jingshai mynsiem kan pynshai ia ki jingmut jong ngi,
Khnang ba ngin lah ban leh bad kren ia kaba bha bad kaba shisha
Ai ba kata ka jingshai mynsiem
kan paw shynna ha ka jingim jong ngi,
Lyngba ki ktien bad ki kam jong ngi.
- H.H.Mohrmen
~~~~~~~~~~~~~~~~~~~~~~~~~~~~~~~~~~
18.
Ki Kyntien Haba Thang Sharak
U Bahai Ullah u ong :
“Ka jingim jong ngi ka long kum i mombati,
“Katba ngi dang ai jingshai ngi nang lut artad ruh.”
To ai namar kata ba kane ka sharak kan pynkynmaw ia ngi;
Ia kane ka jingshisha jong ka jingim.
U Jean Jaures u ong :
“Shim na ka duwan jong ka mynnor, ia ka Ding ym ia ka Dpei.”
Ym kum ka tdem kaba her bad ka dpei kaba lehnohei,
Ai ba ka ding jong ka jingshai bad jingrhem mynsiem,
Kan iailong lem bad ngi ha ki por baroh.
- H.H.Mohrmen
~~~~~~~~~~~~~~~~~~~~~~~~~~~~~~~~~~
19.
Ka Sharak Ka Jingiohlait
Ngi thang ia kane ka sharak jong ka jinglaitluid,
Ka nisan jong ka Balang Unitarian jong ngi.
Ha ka mynsiem jong ka jingngeit, ka jingkyrmen bad ka jingieid.
Katba ngi dang leh kumne, ngi pynphalang la ki jingmut shipor,
Ha kane ka jaka jong ka jingitynnad ba jem hin,
Ia ka jingmut jong kine ki lai tylli ki bynta ha ka jingim jong ngi.
Bad ngin kynmaw ia kito ki bym don hangne,
Ba kata ka mynsiem ba shitrhem jong kito kiba ngi ieid thep mynsiem kan ym phet na ngi,
Hynrei kan iaisah ha ki dohnud jong ngi junom.
(Sngap shipor)
Bad mynta wan sha kane ka jylli;
Kane ka jingiashemlang jong ka jingkhuid bad ka jingkoit
Wan bad phin sa iohmad ia ka jingsuk bad ka jingkmen.
Judith Crompton
~~~~~~~~~~~~~~~~~~~~~~~~~~~~~~~~~~
20.
Ka Jingshai Hapdeng Jong Ngi
Ngi tbeh ia kane ka jingshai hapdeng jong ka jylli jong ngi.
Ai ba kan long ka dak jong ka jingshai, ka jingrhem bad jingim
Hapdeng jong ka jingim jong ngi baroh.
Ai ba kan phalang ia ka jingshai jong u parabangeit jong ngi hangne
Bad kumjuh ruh ha kylleng satlak ka Pyrthei.
- Patricia Oliver
~~~~~~~~~~~~~~~~~~~~~~~~~~~~~~~~~~
21.
Haba Pynlip Ia Ka Sharak
Ngi pynlip ia kane ka sharak,
Hynrei ym ia ka jingshai kaba ngi la ioh;
Namar kata kan iaisah bad ai jingshai ia ngi.
Ngi pynpleh ia kane ka ding,
Hynrei ym ia ka jingsyiad kaba kala ai,
Namar kane kan nang ai jingshit ia ki mynsiem jong ngi.
Ngi pynlip ia kane ka sharak,
Hynrei ngin ym lah ban klet ia ka jingrhem mynsiem kaba ngi la ioh,
Namar kane kan nang pynshit pynrhem ia ki mynsiem jong ngi baroh.
H.H.Mohrmen
~~~~~~~~~~~~~~~~~~~~~~~~~~~~~~~~~~
22.
Thang Sharak.
Ngi thang ia kane ka sharak ban pynkynmaw ialade
Ban leh bha leh isynei ia ki parabriew baroh
Namar ki dei ki hymmen bad para jong ngi,
Ban ri bad sumar ia ka pyrthei
Namar ka dei ka iing jong ngi.
Bad ban pyrshang ban im ka jingim kaba dap daka jingbha bad shlei da ka jingieid
Namar dei da kumta ba ngi lah ban long ki briew kiba bha shynrang bad kynthei.
~~~~~~~~~~~~~~~~~~~~~~~~~~~~~~~~~~
23.
Ka Jingkynmaw ieid ka dei kaba kynja Mynsiem.
Ka Jingkhawai U Trai ka dei ka jingkynmaw burom kaba ki Jiw ki khot ka Passoner. Leh ia kane ba phin kynmaw ia nga, ong u Jisu.
Ka jingkynmaw burom ka dei namar kata ka jingkhawai ba kynja mynsiem.
Ka dei kaba ngi leh da ka mynsiem. Ka dei kaba ngi leh da ka mynsiem kaba sngewnguh. Kaba ngi leh ruh da ka jingburom kaba kyntang eh.
Namar kata to ngi pyndon burom mynta ia kane ka jinglehniam kaba kyntang da kaba kynthah ding ia kane ka sharak jong ka jingshai.
~~~~~~~~~~~~~~~~~~~~~~~~~~~~~~~~~~
24.
No comments:
Post a Comment