1.
Ka Jingsngewbha Bad ka Jingsngewsih
Nangta ka Almitra ka ong, iathuh ia ngi shaphang ka jingsngewbha bad jingsngewsih.
Bad ula jubab;
Ka jingkmen jong phi ka long ka jingsngewsih jong phi ka bym pat paw,
Bad na ka juh ka Pung kaba ka jingkmen jong phi ka mih, teng teng da dap ruh da ki ummat jong phi.
Bad kumno pat ka long?
Katba na pong jylliew ka jingsngewsih ia ka jinglong briew jong phi bad kumta ruh phin dang lah ban pdiang ia ka jingsngewbha.
Hato ym dei kato ka khuri ba dap waiñ jong phi, ka dei kajuh ka khuri ba la thang ha shlem ding da u nongshna khuri?
Hato kato ka sharati ba pynhun mynsiem ia phi, kam dei ka dieng kaba tah khlong thliew da ka Tari?
Haba phi leh kmen; phai bad peit thuh jylliew bha hapoh la ka dohnud ba phin shem ba ka dei kato kaba pynsngewsih ia phi ia kaba ai jingkmen pat ia phi.
Haba phi sngewsih, phai sha la ka dohnud bad phin sa iohi ba ha ka jingshisha phi iam ia kaba la ju long ka jingkmen jong phi.
Don napdeng jong phi kiba ong. “Ka jingsngewbha ka kham khraw ban ia ka jingsngewsih”, bad kiwei pat ki ong em “em, ka jingsngewsih ka kham khraw”.
Hynrei ngan ong ha phi, ki long ki bym lahpyniakhlad
Baroh ar ki wan lang bad haba kawei ka shong ha ka lieng jong phi, kynmaw ba kata kawei pat ka dang thiah ha ka jingthiah jong phi
Da shisha ia phi la teh kum ka tarajur hapdeng ka jingsngewsih bad jingsngewbja.
Dei tang haba phi thylli ba phi ieng beit thik bad long mar ryngkat
Bad haba u Nongbat – mawkordor u shim ia phi ban thew ia ka ksiar bad ka rupa jong u, dei hangta kein ba ka jingkmen bad jingsngewsih jong phi ka hiar bad ka kiew.
Khalil Gibran
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
2.
Jingiap Pha Wat Nym Sarong
Jingiap Pha Wat Nym Sarong
Wat la ki khot ia pha kaba triem
hynrei pham long shisha kumta.
Kito kiba pha mut ba pha iuh roit; ki khlem iap.
Jingiap kaba pli wat mynta ruh pham lah pyniap satia ia nga.
Na jingshongthait bad jingthiah; kiba long tang ki syrngiew jong pha,
(Katno) jingsngewbha nga ioh (?) na pha lei kham bun kan tuid
Bad shen ki briew ba bha bad pha kin leit
La met kin pynshongthait bad la ka mynsiem ban aiti
Hala ka kam pha long mraw ha ka nusib, ka jingjia ryngkhat bad ki syiem balamwir.
Bad kumjuh ruh ha ka bih, ka thma bad ki jingpang pha shong
Lada ki jingdih buaid bad jingshoh jadu ki lah ban pyniohthiah jai ia nga
Kham bha lei jingtied jong pha, balei ngan tieng namar kata?
Shisien thiah shipor, bad ngin khie pat shi junom,
Bad ka jingiap kan ym don shuh. Jingiap phan sa iap.
John Donne
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
3.
Ha Ka Sngi Ba Ka Jingiap Kan Wan
Ha ka sngi kaba ka jingiap kan wan tied ha ka jingkhang jong phi
Kaei kaba phim tyrwa haka?
Oh! ngan buh hakhmat u nongwan kai jong nga, u khiew ba dap mam ka jingim jong nga.
Ngan ym shah ba un leit phai thylli.
Baroh ki jinglum bathiang ha baroh ki sngi pynrem bad meit lyiur jong nga, baroh ki jingioh myntoi bad kiba tam na kaba ioh ot ha ka jingim ba minot jong nga.
Ngan buh ha khmat jong u; haba la kut ki sngi jong nga,
Haba ka jingiap kan wan tied ha ka jingkhang jong nga.
Rabindranath Tagore
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
4.
Ka Dor Ka Jingiap
Ka jingiap kam dei ka dor kaba rem palat kaba ngin hap siew
Na ka bynta ka jingim. Ki lum kim ju iap, lymne ki duriaw, ki mawsiang ne ka suinbneng bym ju kut.
Lyngba ki spahsnem bym lah niew, ki iaineh, khlem iap. Hynrei kim ju im pat!
Lada ioh ban jied, ngam artatien.
ban jied ia ka jingim ban sa kut. Kam pher la ka nusib ka dawa kumno kumno rur na ka bynta ka jingim ngan ai,
Namar, ban nym lah iohiia ki madan ba sboh ne ban ym iohsngewia ka jingbeh ka lyer ne ia ka sngi ba syiad halor u shyiap harud ka duriaw ba bang mluh, lymne ban ym ioh ktahia ki kti jong kito kiba nga ieit-khlem kine,baroh ki jingmyntoi na ka bymjukut kan ym shongdor wat tang shi sngi ruh ka jingim bad ka jingieid; long katba long ruh.
Dorothy N. Monroe
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
5.
Ai Ba Ngan Iap Da Ka Jingkmen
Ngi baroh ngi nangiap artad; ka jingim jong ngi ka iai tyllun sha ka jingkut.
Ngi donkam ban ioh ka jinghikai ban im ryngkat bad ka jingiap.
bad ban sngewthuh ba ka jingiap kam dei ka jingjia kaba sniew tam na baroh.
Ngi dei ban tieng ym ia ka jingiap, hynrei ia ka jingim – ka jingim kaba thylli,
Ka jingim kaba khlem ka jingieit,
Ka jingim ka byn shym la tei ha kita ki jingai ba kordor kiba la ai ha ngi baroh iwei pa iwei,
Ka jingim kaba kum kaba iap hi,
Ka jingim kaba ngim ju ioh por ban mad bad ban iaroh,
Ka jingim kaba ngim ju ioh por ban sangeh shipor bad ban ring mynsiem khia.
Kaei kaba ngi dei ban tieng ka dei ym ia ka jingiap, hynrei ka jingpynsyrwa ia ka jingim kaba phyla kaba la ai ha ngi.
Namar kata ai ba ngan iap da ka jingkmen, da kaba pdiang ia ki por bad ki khyllipmat ka jingim baroh. Ai ba ngan iap da kaba ioh bat ia ki kti jong kito kiba nga ieit baroh, bad ban kynmaw ba nga la pyrshang ban ieit bad nga ioh diang kylla ia ka jingieit. Ai ba ngan iap da kaba kynmaw ba ka jingim ka long kaba bha, bad ba nga la pyrshang katba shong ha ka bor. Hynrei mynta, shu pynkynmaw ia nga ba nga nang – iap artad khnang ba ngan lah ban im, ban lum bad ban ieid da la ka dohnud baroh.
-Mark Morrison – Reed
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
6. Sha Phang Ka Jingiap
Nangta ka Almitra ka ong:
Ngin kylli mynta shaphang ka jingiap
Bad u ong:
Phin sa tip shaphang ka jingphylla ka jingiap
Hynrei kumno phin shem ia ka lymda phi wad ia ka ha ka dohnud jong ka jingim jong phi?
Ka Dkhoh haba ki khmat ki shai tang mynmiet, bad matlah mynsngi.
Kan ym lah ban shemphang ia ka jingphylla jong ka jingshisha.
Lada phi kwah da shisha ban iohi ia ka mynsiem ka jingiap, Plie rynghang ia ka dohnud jong phi ha ka met jong ka jingim.
Namar kumba ka jingim bad ka jingiap ki long kawei, kumba ka wah bad ka duriaw ruh ki long kawei.
Ha ka jingjylliew ka jingkyrmen bad jingthrang jong phi ka don ka jingtip ba jar jar jong ia kaba sha lynded. Bad kumba u symbai ba phohsniew hapoh ka ior.
Ka dohnud jong phi ka thrang ia ka pyrem.
Shaniah ha ka jingphohsniew,
Namar ha ka la buhrieh ia ka khydop sha bymjukut.
Ka jingtieng jong phi ia ka jingiap;
Ka long kum ka jingkhohñioh u nongap langbrot,
Haba u ieng ha khmat u Syiem
Uba pyiar la ki kti ban pynkup burom ia u
Hato u nongap langbrot um kmen hapoh la ka jingkhohnioh, ba un sa deng ia ka shap jong u syiem?
Hynrei wat la katta ruh um sngewthuh ia la ka jingkhohnioh.
Namar ka mut aiu ban iap hynrei ban ieng lyngkhuid ha ka lyer bad ban um ha ka sngi?
Bad ka mut aiu ban sangeh ring mynsiem hynrei ban pynhiar mynsiem na ka jingthiah jingkiew ba khlem thait jong ka, khnang ba kan kiew ban pyiar bad wad ia ka jingbymjukut jong u Blei.
Khalil Gibran
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
7.
Jingiap U Shakri Jong Pha Ha Khyrdop Jong Nga
Jingiap u Shakri jong pha ha ka Khyrdop jong nga
Ban wanrah ia ka jingkhot jong pha ia nga sha la iing
U la kam ia ki duriaw bym lah batai
Ban wan rah ia ka jingkhot jong pha, ia nga sha la iing
Ka miet ka dum bad ha la dohnud nga tieng.
Wat la katta ruh ngam shim la ka sharak, plie ia ka khyrdop.
Bad dem ngon ha u da ka jingpdiang sngewbha.
Udei u nong kit ‘tien Syiem jong pha, uba ieng ha ka jingkhang jong nga.
Ngan kdup ia la ki kti bad la ki ummat ba jaw nang ainguh ia u.
Ngan ainguh da kaba buh ki kti ha ki kjat jong u; ka spah bala kynshew ka dohnud jong nga
Un leit phai biang bad ka khubor ba u la dep sam,
Un iehnoh shadein ka syrngiew ba dum ha ka step ba phyrnai jong nga.
Bad ha ka iing ba kynjah jong nga;
Tang kaba nga la iehnoh kan sah, kum ka jinjgainguh jong nhga ia pha.
R. Tagore
~~~~~~~~~~~~~~~~~~~~~~~~~~~~~~~~~~~~~~
8.
No comments:
Post a Comment